Luke 2.6-40<br>
<br>
<p> factum est autem cum essent ibi impleti sunt dies ut pareret<br>
<br>
et peperit filium suum primogenitum et pannis eum involvit<br>
et reclinavit eum in praesepio <br>
quia non erat eis locus in diversorio<br>
<br>
et pastores erant in regione eadem vigilantes<br>
et custodientes vigilias noctis supra gregem suum<br>
<br>
et ecce angelus Domini stetit iuxta illos<br>
et claritas Dei circumfulsit illos<br>
et timuerunt timore magno<br>
<br>
et dixit illis angelus nolite timere<br>
ecce enim evangelizo vobis gaudium magnum quod erit omni populo<br>
<br>
quia natus est vobis hodie salvator<br>
qui est Christus Dominus in civitate David<br>
<br>
et hoc vobis signum<br>
invenietis infantem pannis involutum<br>
et positum in praesepio <br>
<br>
et subito facta est cum angelo multitudo militiae caelestis<br>
laudantium Deum et dicentium<br>
<br>
gloria in altissimis Deo<br>
et in terra pax in hominibus bonae voluntatis<br>
<br>
et factum est ut discesserunt ab eis angeli in caelum<br>
pastores loquebantur ad invicem<br>
transeamus usque Bethleem<br>
et videamus hoc verbum quod factum est<br>
quod fecit Dominus et ostendit nobis<br>
<br>
et venerunt festinantes et invenerunt Mariam et Ioseph<br>
et infantem positum in praesepio<br>
<br>
videntes autem cognoverunt de verbo<br>
quod dictum erat illis de puero hoc<br>
<br>
et omnes qui audierunt mirati sunt<br>
et de his quae dicta erant a pastoribus ad ipsos<br>
<br>
Maria autem conservabat omnia verba haec conferens in corde suo<br>
<br>
et reversi sunt pastores glorificantes et laudantes Deum <br>
in omnibus quae audierant et viderant<br>
sicut dictum est ad illos<br>
<br>
et postquam consummati sunt dies octo<br>
ut circumcideretur <br>
vocatum est nomen eius Iesus<br>
quod vocatum est ab angelo priusquam in utero conciperetur<br>
<br>
et postquam impleti sunt dies purgationis eius secundum legem Mosi<br>
tulerunt illum in Hierusalem ut sisterent eum Domino<br>
<br>
sicut scriptum est in lege Domini<br>
quia omne masculinum adaperiens vulvam sanctum Domino vocabitur<br>
<br>
et ut darent hostiam<br>
secundum quod dictum est in lege Domini <br>
par turturum aut duos pullos columbarum<br>
<br>
et ecce homo erat in Hierusalem cui nomen Symeon<br>
et homo iste iustus et timoratus expectans consolationem Israhel<br>
et Spiritus Sanctus erat in eo<br>
<br>
et responsum acceperat ab Spiritu Sancto<br>
non visurum se mortem nisi prius videret Christum Domini<br>
<br>
et venit in Spiritu in templum<br>
et cum inducerent puerum Iesum parentes eius<br>
ut facerent secundum consuetudinem legis pro eo<br>
<br>
et ipse accepit eum in ulnas suas et benedixit Deum et dixit<br>
<br>
nunc dimittis servum tuum Domine<br>
secundum verbum tuum in pace<br>
<br>
quia viderunt oculi mei salutare tuum<br>
<br>
quod parasti ante faciem omnium populorum<br>
<br>
lumen ad revelationem gentium et gloriam plebis tuae Israhel<br>
<br>
et erat pater eius et mater mirantes super his quae dicebantur de illo<br>
<br>
et benedixit illis Symeon<br>
et dixit ad Mariam matrem eius<br>
ecce positus est hic in ruinam et resurrectionem multorum in Israhel<br>
et in signum cui contradicetur<br>
<br>
et tuam ipsius animam pertransiet gladius<br>
ut revelentur ex multis cordibus cogitationes<br>
<br>
et erat Anna prophetissa filia Phanuhel de tribu Aser<br>
haec processerat in diebus multis<br>
et vixerat cum viro suo annis septem a virginitate sua<br>
<br>
et haec vidua usque ad annos octoginta quattuor<br>
quae non discedebat de templo<br>
ieiuniis et obsecrationibus serviens nocte ac die<br>
<br>
et haec ipsa hora superveniens confitebatur Domino<br>
et loquebatur de illo omnibus<br>
qui expectabant redemptionem Hierusalem <br>
<br>
et ut perfecerunt omnia secundum legem Domini<br>
reversi sunt in Galilaeam in civitatem suam Nazareth<br>
<br>
puer autem crescebat et confortabatur plenus sapientia<br>
et gratia Dei erat in illo<br>