-=  Facta & Verba  =-

Cons. Phil. Book 5 Metrum 5

Metrum 5

1 Quam uariis terras animalia permeant figuris!
2 Namque alia extento sunt corpore pulueremque uerrunt
3 continuumque trahunt ui pectoris incitata sulcum;
4 sunt quibus alarum leuitas uaga uerberetque uentos
5 et liquido longi spatia aetheris uolatu enatet;
6 haec pressisse solo uestigia gressibusque gaudent
7 uel uirides campos transmittere uel subire siluas.
8 Quae uariis uideas licet omnia discrepare formis,
9 prona tamen facies hebetes ualet ingrauare sensus;
10 unica gens hominum celsum leuat altius cacumen
11 atque leuis recto stat corpore despicitque terras.
12 Haec, nisi terrenus male desipis, ammonet figura:
13 Qui recto caelum uultu petis exserisque frontem,
14 in sublime feras animum quoque, ne grauata pessum
15 inferior sidat mens corpore leuius leuato.

-=  Facta & Verba  =-