-=  Facta & Verba  =-

Cons. Phil. Book 3 Metrum 6

Metrum 6

1 Omne hominum genus in terris simili surgit ab ortu;
2 unus enim rerum pater est, unus cuncta ministrat.
3 Ille dedit Phoebo radios, dedit et cornua lunae,
4 ille homines etiam terris dedit ut sidera caelo;
5 hic clausit membris animos celsa sede petitos;
6 mortales igitur cunctos edit nobile germen.
7 Quid genus et proauos strepitis? Si primordia uestra
8 auctoremque deum spectes, nullus degener exstat,
9 ni uitiis peiora fouens proprium deserat ortum.

-=  Facta & Verba  =-